Pagsunlundan nga himuon samtang nagalinog, dapat nga i-internalize sang publiko suno sa Iloilo PDRRMO

𝗜𝗟𝗢𝗜𝗟𝗢 — Importante para sa publiko nga i-internalize ang mga pagsulundan nga dapat sundon kun may yara sang linog.

Ini kasunod man sang paghiwat sang 2nd Quarter Nationwide Earthquake Drill sang Iloilo Provincial Capitol kag pila ka mga talatapan sa bilog nga Pilipinas.

Sa interview sang Bombo Radyo kay Cornelio Salinas, Head sang Iloilo Provincial Disaster Risk Reduction and Management Office, iya ginpahayag nga tuyo sang kahiwatan ang target nga zero casualty kun may magluntad nga linog sa Iloilo.

Suno kay Salinas, ang may ihibalo sa linog ang isa ka “gold standard” nga dapat kabahin sang pagpangabuhi sang isa ka Filipino ilabi na nga yara ang Pilipinas sa Pacific Ring of Fire nga buot silingon, ginapalibotan sang mga aktibo nga bulkan.

Nagapati man ini nga isa ka responsibilidad nga magluwas sa isigkapareho kun kinahanglanon ilabi na kun yara na sa aktwal nga kalamidad.

Nagpanugyan man ini sa publiko nga hibaluon ang basic steps agud maluwas sa linog, kaangay na lamang sang “duck, cover, and hold”.

Nagpasalamat naman ang natungdan sa mga opisyal sang pila ka talatapan kag ahensya sang Iloilo Province nga nagtambong sa nasambit nga kahiwatan.