‘Dasuuurv’ sang Duterte Youth nga ma-suspinde ang proklamasyon bilang isa sa mga nagdaog sa 2025 partylist elections.
Ini ang komento ni Kabataan party-list Representative-elect Atty. Renee Co matapos nga wala nadala ang nasambit nga grupo sa ginproklamar sang Commission on Elections (Comelec) kahapon, Mayo 19, bangud sa pending nga mga kaso.
Ini nga termino nga nagakahulugan “deserving” amo ang nagakabagay lang sa grupo suno kay Co ilabi na bangud madugay na ang panawagan para sa ila nga disqualification.
Halin sang 2019 suno kay Co, madamo na sang anomaliya sa rehistrasyon sang grupo nga makabig nga iligal kag unconstitutional.
Ginpahayag man sini nga indi man representasyon sang kabataan ang Duterte Youth, bangud wala gid sini gina-address ang kinahanglanon sang sector kaangay sang ila kinamatarong, edukasyon, kag kasiguruhan sa trabaho.
Para naman kay Representative-elect Leila De Lima, sulod sa pagsulundan sang Comelec nga kun may pending nga kaso batok sa anuman nga grupo, isuspinde anay ang proklamasyon.
Nahibaluan nga may tatlo ka seats nga nadag-an ang Duterte Youth; samtang may isa ka seat naman ang Bagong Henerasyon (BH) nga isa man sa nasuspinde ang proklamasyon.
Ginsiguro naman ni Comelec chairman George Garcia nga ma-resolba ang kaso sang duha ka partylist antes ang Hunyo 30 ukon ang pagbukas sang 20th Congress.
Ginpaathag man sini nga ang desisyon sang poll body sa suspension ang wala ginbase sa anuman nga motion ukon manifestation to suspend sa proclamation. Pahayag sini, kaugalingon ini nga discretion sang National Board of Canvassers kaupod sa Comelec divisions nga naga-uyat sang kaso.
