Nagbuga sang itom nga abo ang Bulkan Kanlaon pasado las-11:45 sang aga subong nga Lunes, Disyembre. 23, 2024.
Suno sa Philippine Institute of Volcanology and Seismology (PHIVOLCS), ang ginbuga nga abo sang bulkan ang naglab-ot sa 1.2 km. ang kataason.
Mahimo naman magtupa ang abo sa mga komunidad sang Negros Occidental sa aminhan-nakatundan kag nakatundan sang bulkan.
Suno naman kay Phivolcs Director Teresito Bacolcol, nakarekord sila sang 15 ka volcanic earthquake kag 7,198 ka tonelada sang sulfur dioxide sa nakaligad nga 24 oras gikan sa Bulkan Kanlaon.
Ginpahayag man ni Bacolcol nga madamo sang ash emissions kag ang presensya sang dark ash ang posible tuga sang gas-driven explosion sa crater sang bulkan.
Dugang pa, naobserbahan man sang Phivolcs ang pagtaas sang volcanic ash emission sa bulkan, kag ginpahanumdom ang mga pumuluyo subong man ang mga lokal nga panguluhan nga maghalong.
Ginpanugyanan man nila ang mga local government units (LGUs) nga regular nga bantayan ang kondisyon sang panahon pareho sang mabaskog nga pag-ulan nga mahimo makatuga sang lahars kag sediment-laden streamflow.
Nagapabilin sa gihapon sa Alert Level 3 (magmatic unrest) ang Mt. Kanlaon.
