ILOILO CITY – Pagkatapos sang tatlo ka tuig, liwat nga magabalik Ang Pagtaltal Sa Bala-an Bukid sa Jordan, Guimaras.
Ini ang patigayunon sa Byernes Santo, April 7, 2023.
Ang Street Play ang hiwaton alas-dose sa udto tubtob alas-tres sa hapon kag magasugod sa Smallest Plaza sa Poblacion, Jordan padulong sa Bala-an Bukid Shrine, Balcon Melliza, Jordan.
Ini ang naandan nga re-enactment sang mga kasakit kag sakripisyo ni Hesukristo padulong sa bukid sang kalbaryo.
Sa interview sang Bombo Radyo kay Bartolome Togonon, presidente sang Pagtaltal sa Bala-an Bukid Foundation, Inc., iya ginpahayag nga ang street play ang pasakupan sang 131 ka mga actors nga ginabug-usan sang mga estudyante, manunudlo, kag out-of-school youths.
Suno kay Bartolome, bangud nga tatlo ka tuig nga na-untat ang aktibidad bangud sang pandemya, nabudlayan sila nga magtipon sang mga actors kag mangin sang mga costumes.
Sa budget naman, nagpangayo sang bulig ang foundation nagikan sa local government unit sang Jordan.
Ang provincial government sang Guimaras ang naghatag sang ₱ 425,000 nga assistance.
Ang Pagtaltal Sa Bala-an Bukid ang collaboration sang Guimaras Provincial Government, local government unit sang Jordan, kag Iloilo City Government.
