ILOILO CITY – Madamu sang mahatag sang benepisyo kag kaayuhan ang pagtanom sang Mangroves ukon katunggan.
Sa interview sang Bombo Radyo kay Dr. Rex Sadaba, outstanding Ilonggo scientist, researcher kag Professor sa University of the Philippines-Visayas, iya ginpahayag nga ang pagtanom sang Mangroves ang makabulig indi lamang sa pagpanami sang palibot kundi makabulig man ini sa pagbuhin sang carbon dioxide emission.
Magluwas diri, ang Mangroves ang makabulig man sa coastal protection ilabi na sa tion sang kalamidad kag nagaserbe man ini bilang breeding ground sang mga water species kasubong sang isda.
Ang Mangroves ukon ang katunggan suno kay Dr. Sadaba ang isa ka salt tolerant plant nga nagakabuhi sa higad sang baybay.
Sa bulig sang pagpanalawsaw, ang propagules ukon ang bunga sang Mangroves ang mahimo buhaton nga tinapay, harina, tsa-a kag honey kasubong sa iban nga pungsod.
Ginpahanumdum man ni Dr. Sadaba nga nagakadapat nga tipigan ang Mangroves ukon katunggan bangud nga may yara sang layi tuhoy diri.
