Umpisahan na sa Hunyo 5 ang pagtanum sang native trees sa syudad sang Iloilo bilang bulos sa mga royal palms nga nagkalamatay bangud sa tuman nga init.
Sa interview sang Bombo Radyo kay Engineer Neil Ravena, pinuno sang General Services Office, iya ginpahayag nga 120 na ka mga buho ang napreparar sa center island sang Diversion Road kasunod sang clearing nga ginhimo sa lugar.
Ang igabulos diri amo ang 128 ka puno sang Dita ukon crowning tree agud nga makahatag sang handong kag mabuhin-buhinan ang init.
Una na nga ginpahayag nga tatlo tubtub lima ka tuig pa antes dalayon nga mag-mature ang native trees, apang ginpasalig man sini nga may mga estratehiya sila nga gamiton agud manggamot gid sang maayo ang kahoy kag mangin mabakod para indi dayon matumba sa tion nga mag-bagyo.
Suno pa kay Ravena, may itanum man sa kilid sang Diversion Road nga amo ang medium-sized native trees nga Balitbitan kag Banaba.
Pahayag pa sang natungdan, sa Diversion Road lang anay ang konsentrasyon sang tree-growing activities subong nga bulan apang sunod man nga handaan ang pagpangtanum sang kahoy sa tree parks kag open spaces sa mga subdivision kag relocation site.
Nahibaluan nga masobra 100 ka royal palms sa syudad ang nalaya ilabi na sa Ungka center island pakadto sa Diversion amo man sa distrito sang Arevalo bangud sa epekto sang El Niño phenomenon.
