Ginplastar ni Coach Tim Cone nga klaro ang gusto lab-uton sang Gilas Pilipinas kag ini amo ang pagtapak sa Olympiada.
Wala sang kasiguraduhan suno sa coach kun matabo ini sa Paris, France subong nga tuig ukon sa Los Angeles sa masunod nga edisyon, apang sa idalom sang iya pagpamuno, ang Olympics ang magapabilin nga ultimate goal sang team.
“I’ve said it before, our goal, in my mind, is to make the Olympics. I think that’s really our goal and whether it be Paris or whether it be LA in four years or five years, our goal is to make the Olympics,” suno sa coach.
Ang banas padulong sa sini nga handum ang maga-umpisa sa Huwebes kun atubangon na sang men’s basketball team sang Pilipinas ang Hong Kong sa una nga window sang 2025 FIBA Asia Cup qualifiers.
Ini nga regional qualifiers ang kabahin sang apat ka tuig nga plano ni Cone para sa national team kun sa diin nalakip man ang pag-appoint sang iya permanente nga core team nga ginapangunahan sang naturalized import nga si Justin Brownlee.
Yara man sanday June Mar Fajardo, Scottie Thompson, Jamie Malonzo, Chris Newsome, CJ Perez, Calvin Oftana, Dwight Ramos, AJ Edu, Kai Sotto, Carl Tamayo, kag Kevin Quiambao.
Sa imbukada sang kampanya sang Pilipinas sa sini nga hinampang, indi makapasakop sanday Fajardo kag Edu bangud sa ila gina-suprer nga injuries.
Ang Filipino-Cypriot nga si Edu ang nagakinahanglan pa sang isa ukon duha bulan matapos nga nakaangkon sang meniscus injury nga rason man kun ngaa nabangko ini sang Toyama Grouses sa Japanese B.League.
Ang seven-time MVP naman sang PBA nga si Fajardo ang nakangkon man sang calf injury sa Game 4 sang Commissioner s Cup Finals.
Bangud kulang na ang core team, ginpasulod si Japeth Aguilar nga amo ang maga-upod sa Hong Kong.
Sa sini nga regional qualifiers, nagtupa ang Gilas sa Group B kun sa diin makasumpong man sini ang New Zealand kag ang Chinese Taipei.#
Photo: REUTERS/Marko Djurica
