Ipanawagan man sang Simbahan Katolika kadungan sang mobilisasyon sa ika-40 nga anibersaryo sang EDSA People Power Revolution ang pagtapna sa political dynasties sa Pilipinas.
Sa interview sang Bombo Radyo kay Msgr. Meliton Oso, director sang Jaro Archdiocesan Social Action Center (JASAC), iya ginpahayag nga ini nga dinastiya amo man ang ugat sang kurapsyon.
Suno kay Oso, kadungan sang prusisyon kag prayer rally sa Pebrero 25, ipangamuyo kag ipanawagan sang Simbahan nga mangin sinsero kag seryoso man ang Kongreso sa pagpasar sang mga hagna batok sa nakaandan nga pagpasa-pasa sang gahum sa magpamilya sa pulitika.
Ginbalikan sang JASAC Director ang statement nga gin-isyu sang Catholic Bishops’ Conference of the Philippines-Episcopal Commission on Catholic Education, Catholic Educational Association of the Philippines, Simbahang Lingkod ng Bayan, kag Caritas Philippines nga nagapanawagan sa paglakip sang pila ka mga probisyon sa anti-political dynasty bills nga pareho nga pending sa Kamara kag Senado.
Sandig sa ginaduso sang church-based groups, limitahan lamang sa “maximum of two relatives per family” ang makauyat sang elective position nga isa sa local office kag isa sa national position kag indi dapat mag-overlap ang jurisdiction.
Ginsuhestyon man nga indi pagpasugtan ang mga maghimata tubtub sa fourth civil degree of consanguinity ukon affinity nga dungan nga makapungko sa elective positions.
Pahayag ni Oso, nagalaum ang Social Action Network sang Simbahan nga indi pakulahaw kag indi lunsay lip-service lang ang ginaproponer nga mga hagna.
Matandaan nga nagmandu si President Ferdinand Marcos Jr. sa Kongreso nga hatagan sang prayoridad ang legislation nga amo ang magadumili sang political dynasties.
Kabug-usan nga 24 ka anti-political dynasty bills ang na-file subong sa Kamara kag Senado lakip na ang House Bill 6771 nga ginduso nanday Speaker Faustino “Bojie” Dy kag presidential son kag House Majority Leader Ferdinand Alexander Marcos.#
