ILOILO CITY–Gindula sang project engineer sang Iloilo Freedom Grandstand ang kahangawa sang Iloilo Dinagyang Foundation Inc. nga indi matapos ang proyekto sa Enero 1, 2019.
Sa interview sang Bombo Radyo kay Engr. Jose Grecia, project engineer sang nasambit nga proyekto, iya ginpahayag nga pagatapuson ang proyekto bag-o pa man ang target date sang completion sini.
Dugang pa ni Grecia, yara na sa 45% ang completion sang proyekto kag ila ginaluman nga matapos sa tunga-tunga sang bulan sang Disyembre.
Ang bag-o nga Iloilo Freedom Grandstand ang may budget nga 45.5 million pesos kag ini ang ginpatindog sa Muelle Looney kag naga-atubang sa Iloilo River.
Ginmanduan naman sang implementing agency nga City Engineers Office ang kontraktor nga F. Gurrea Constructtion Inc. nga magdugang sang tinawo kag hingalitan ang manami nga panahon agud man nga matapos ang nasambit nga proyekto.
