ILOILO CITY – Wala sang domino effect sa paglupok sang bulkan ang pagtay-og sang mabaskog nga linog kasubong sa natabo sa Cataingan, Masbate.
Ini ang gin-athag sa Bombo Radyo ni Engr. Reynaldo Antioquia, pinuno sang Philippine Institute of Volcanology and Seismology- Roxas City kasunod sang ginpaguwa nga alert level 1 sa apat ka mga bulkan nga ginalakipan sang Taal, Kanlaon, Mayon kag Bulusan matapos ang pagluntad sang magnitude 6.6 nga linog.
Sa pagpaathag ni Antioquia, mahimo nga natabu-an lamang nga may nagluntad nga linog kag nagpakita man sang volcanic activity ang nasambit nga mga bulkan apang indi lang niya mapatpat ang mga detalye bangud nga ang PHIVOLCS ang nakasentro lamang sa earthquake information.
Suno kay Antioquia, magnitude 6.6 ang kabaskugon sang linog nga nag-igo sa banwa sang Cataingan nga mas mataas sa magnitude 6.5 nga una nga nabalhag sa earthquake information no. 1.
Ginpahayag ni Antioquia nga sa una nga earthquake information, initial pa lang nga mga detalye ang ila natipon kag sa padayon nga pagsulod sang mga impormasyon, amat-amat na nga maplastar ang kabug-usan nga detalye.
Bangud nga sa duta ang sentro sang pagtay-og, wala sang tsunami warning nga ginpaguwa bangud nga nagatuhaw lamang ang tsunami kun sa idalom sang dagat ang epicenter sang linog.
