ILOILO CITY – Pagtib-ong sa kinamatarong kag katungdanan sang kabataan ang sentro sang ika-27 nga pagsaulog sang National Children’s Month subong nga Nobyembre.
Ang National Children’s Month ang may tema nga “Karapatang Pambata: Patuloy na Pahalagahan at Gampanan Tungo sa Magandang Kinabukasan”.
Sa Good Morning Philippines program, ginpahayag ni Winde Ivy Baclas, program officer, Technical and Vocational Education and Training – Iloilo Children Welfare Foundation Inc., nga lakip sa rights and responsibilities sang tagsa ka bata amo ang Survival, Developmental, Participation kag Protection.
Suno kay Baclas, indi mahinago nga sa subong, madamu ang kaso sang pagpang-abuso sa kabataan rason nga dapat pasangkaron pa gid sang gobyerno ang children’s program.
Ginpahayag ni Baclas nga lakip sa mga pamaagi agud nga mapalapnag ang tuhoy sa United Nations Convention on the Rights of the Child kag ang tuhoy sa Child and Youth Welfare Code amo ang school-based kag community-based implementation sang nasambit nga adbokasiya.
May kaangtanan sa school-based implementation, ang tagsa ka pamunu-an sang eskwelahan ang may yara sang tagsa ka mga pamaagi agud nga makabulig.
Ginpahanumdom man ni Baclas nga magluwas sa kinamatarong, nagakadapat man nga mabinag-binag sang kabataan nga may yara man sila sang katungdanan sa komunidad.
Hugot nga ginapakamalaot sang SOS Children’s Village ang bisan ano nga sahi sang pagpang-abuso sa kabataan.
Sa Good Morning Philippines program, ginpahayag ni Felix Guilaran Jr., director sang SOS Children’s Village sa Zarraga, Iloilo, indi lamang sa tion sang National Children’s Month dapat nga ipahanumdum kag ipatuman ang tuhoy sa pagtib-ong kag pagpangapin sa kabataan.
Suno kay Guilaran, nagakadapat nga mahangpan sang tanan ang tuhoy sa rights and responsibilities ukon kinamatarong kag katungdanan sang tagsa ka bata.
Ginpahayag ni Guilaran nga kabahin sa kinamatarong sang kabataan amo ang pag-angkon sang maayo nga kabuhi.
Nagalab-ot sa 108 ka abandoned kag neglected children ang yara sa pag-inakop sang SOS Children’s Village nga isa ka non-profit organization.
May kaangtanan sa pagsaulog sang National Children’s Month subong nga bulan, may yara sang patigayunon nga Pasundayag sang mga Kabataan sa Nobyembre 23 sa diin ipakita ang nanari-sari nga abilidad sang kabataan kun arts ang pagahambalan.
May yara man sang mga dinapit nga bisita nga magatambong sa nasambit nga kahiwatan nga patigayunon sa isa ka mall sa distrito sang Mandurriao.
