ILOILO CITY – Ang pagtib-ong sang mga local products ang katuyu-an sang pagtukod sang Produkto Lokal Weekend Fair.
Sa interview sang Bombo Radyo kay Rayjand Gellamucho, isa sa mga co-founder sang Produkto Lokal Weekend Fair, iya ginpahayag nga ang Produkto Lokal ang isa ka platform para sa mga young entrepreneur paagi sa isa ka weekend fair.
Suno kay Gellamucho, ang Produkto Lokal Weekend Fair ang isa ka banner program sang Youth First Initiative Philippines, Inc. nga isa ka non-government kag human rights based organization nga may nagatuyo sang social development paagi sa community empowerment kag social entrepreneurship.
Ginpahayag ni Gellamucho nga ini na ang ika-tatlo ka tuig sang Produkto Lokal Weekend Fair nga amo ang nag-umpisa sang pagpatigayon sang weekend fair sa saguwa sang mall.
Sa nasambit nga weekend fair suno kay Gellamucho, makita ang nanari-sari nga local products nga ginalakipan sang food kag non-food products.
Mayor nga katuyu-an sang pagtukod sang Produkto Lokal Weekend Fair amo ang paghatag sang kahigayunan sa young entrepreneurs kag sa iban pa nga youth organization sa patag sang pagnegosyo.
Samtang, ginpahayag naman ni Keithlyn Bernardino sang Youth First Initiative Philippines, Inc., nga bangud nga isa ka non-profit organization ang Produkto Lokal Weekend Fair, isa sa mga pagpanghangkat sa ila amo ang kakulang sang manpower.
Sa pagpaathag ni Bernardino, sila sa Youth First Initiative Philippines, Inc. ang may yara man sang tagsa ka trabaho rason nga indi gid sila makahatag sang full-time sa Produkto Lokal Weekend Fair.
Ini ang rason kun nga-a nagapakig-angot sila sa iban pa nga youth organization agud nga mapadayon ang ila adbokasiya nga amo ang pagtib-ong sang local products kag local artist.
