Ginalantaw sang kapulisan ang anggulo nga posible nga pagtimalos kasunod sang pagpangluthang sa mga opisyal sang isa ka barangay samtang ginapatigayon ang regular flag ceremony sa Dasmariñas City, Cavite kaina sang aga.
Suno kay Police Captain Michelle Bastawang, public information officer sang Cavite Police Provincial Office, antes ang insidente, ginkakas ang 50-anyos nga suspek sa iya posisyon bilang tanod sa Barangay Salitran 3.
Ginpahayag sang pulis nga sang Mayo, nagkuha pa ang suspek sang iya sweldo sa treasurer, apang wala na ginhatag bangud gin-hold ang sweldo sa iya kag ginpahalin na ini sa serbisyo. Ang ginatudlo nga kabangdanan amo bangud indi na sini matungdan sang maayo ang iya obligasyon bangud sa iya balatian nga diabetes.
Kun balikan, nakuhaan sang video footage ang insidente kaina sang aga sa atubang sang barangay hall. Samtang nagakanta sang Lupang Hinirang ang barangay officials, nag-abot ang suspek kag nagpaniro.
Patay ang 56-anyos nga punong barangay kag ang duha ka barangay kagawad nga naga-edad sang 65-anyos kag 54-anyos, samtang padayon naman nga ginabulong sa ospital ang Sangguniang Kabataan Secretary.
Pagkatapos nahimo ang krimen, nagpauli ang gunman kag gintiro man ang iya kaugalingon. Gindala ini sa ospital apang gindeklarar nga dead on arrival.
Apang base naman sa kay Police Lieutenant Colonel Regino Oñate, Dasmariñas Police chief, posible nga ang treasurer gid ang target sang suspek, bangud suno sa mga testigo, bisan natiro na sini ang kapitan kag ang mga kagawad, nagasinggitan ini kag ginapangita ang treasurer.
Na-recover sa crime scene ang duha ka .45-caliber magazines kasunod sang insidente.
Nagpaguwa naman sang statement si Police Regional Officer 4A Director Gen. Paul Kenneth T. Lucas nga nagamandu sa mga police personnel nga magpatigayon sang ma-id-id nga imbestigasyon.
“Mariin naming kinokondena ang karumal-dumal na insidente ng pamamaril. Agad nating inatasan ang ating mga imbestigador na magsagawa ng malalimang imbestigasyon upang matukoy ang tunay na motibo sa likod ng krimeng ito, at upang mabigyang hustisya ang mga nasawi at sugatang biktima,” kabahin sang pahayag.#
