ILOILO – Makabig nga illegal ang paghigko sa suba kag dagat nga ginakuhaan sang mainom nga tubig.
Sa interview sang Bombo Radyo kay Engr. Edgar Mana-ay, isa ka Hydro Geologist, iya ginpahayag nga nagakadapat nga halungan ang tanan nga source ukon ginakuhaan sang tubig ilabi ang mga suba.
Kun sang una suno kay Mana-ay, 15% sang ulan ang nagapanalupsop sa duta apang sa subong, nagalab-ot na gid lamang sa 7 tubtub 8%.
Ini ang tuga sang deforestation ukon ang pataka nga pagpangtapas sang kahoy nga wala ginatan-nan sang bag-o.
Magluwas diri, makatuga man sang halit sa tubig ang paghaboy sang basura sa suba kasubong na lang sang ginhimu sang Sugar Central sa San Enrique nga paghaboy sang molasses sa Jalaur River nga nagtuga sang water discoloration.
Ang nasambit nga aktu suno kay Mana-ay ang nagtuga sang problema sa tunga sang FloWater Resources Iloilo Inc. kag Metro Iloilo Water District (MIWD).
Sa pagpaathag sang Hydro Geologist, ang indi matin-aw ang gina-supply nga tubig sang FloWater sa MIWD ang wala man sa problema sa ikaayong lawas.
Ini bangud nga bisan nga indi tama ka tin-aw ang tubig kun nakapasar man lang sa tanan nga chemical kag potability test, ini ang hilway nga imnon.
Ugaling lang suno sa natungdan, normal sa tawo nga indi pag-imnon ang tubig nga indi matin-aw.
Sa pagkamatuod suno kay Engr. Mana-ay, ang isa ka planta sang tubig ang gindisenyo lamang agud nga makasolbar sang noral nga discoloration sang tubig ilabi na kun may yara sang force majeure event ukon indi malikawan nga hitabo kasubong sang kalamidad.
Gin-athag man sang natungdan nga wala niya gina-apinan ang FloWater apang bilang isa ka Hydro Geologist, iya nabinag-binag nga ang ginahimu sang MIWD kasubong sang press conference agud pakalainon ang bulk suppier ang makabig nga pagpatalang sa publiko.
