Ginatudlo nga utang nga P15, 000 ang rason sa pagtiro-patay sang suspek sa Bgry. Tanod sa Amparo, Pavia, Iloilo sang gab-i sang Marso 22, 2025.
Ang suspek amo si Regie Gaborno, 41-anyos, driver; samtang ang biktima amo si Carmelino Minor, 51-anyos, kasado, kag lunsay residente sang nasambit nga barangay.
Sa interview Bombo Radyo kay Gaborno, nga amo ang suspek, iya ginpahayag nga una na nga naghulam ang biktima sang Nobyembre 2024 sang P10, 000 para i-down sa ginkuha nga motor sa biktima kag naghulam pa gid ini sang dugang nga P5,600.
Suno sa iya, nagpasalig ang biktima nga ibalik sa Enero 2025, apang wala sini mabaydan.
Gin-ako man sang suspek sa gin-ubra sini nga krimen kag ginpahayag nga wala ini ginhungod nga patyon ang biktima kag self-defense lamang ang natabo.
Nagapati na man ang pamilya sang Barangay Tanod nga gintiro-patay sa Brgy. Amparo, Pavia nga wala ini sang utang sa suspek.
Suno kay Regina Minor, 49-anyos, asawa sang biktima, iya ginpahayag nga sang Enero 30 nagkuha ini sila sang motor nga naga-balor sang P108,000 kag nag-down gamit ang kwarta nga gin-ubrahan nila sang ila anak sa construction sa Leganes.
Ginpahayag man sang asawa sini nga tama ka imposible nga may hulam ang iya bana bangud indi man kuno mismo mabayaran sang suspek ang ginakuha sini nga motorsiklo
