ILOILO CITY – Gina-imbestigaran pa sang Mandurriao PNP ang nagluntad nga pagpangluthang sa duha ka call center agents sa Brgy. Taft North, Mandurriao, Iloilo City.
Sa interview sang Bombo Radyo kay Police Major Marlon Valencia, hepe sang Mandurriao Police Station, iya ginpahayag nga call center agents ang duha ka mga biktima nga ginluthang sang riding in tandem.
Suno kay Valencia, indi pa nila makompirma kun bala magkaupod sa trabaho sanday Mark Muller kag Christopher Jinon.
Suno kay Valencia, nakaangkon sang multiple gunshot wounds ang 38 anyos nga si Mark Muller sang Cuartero St., Jaro Iloilo, City nga ginbawi-an sang kabuhi.
Nakaangkon naman sang igo sa paa ang 32 anyos nga si Christopher Jinon sang Brgy. Bularan, Banate, Iloilo nga sa subong padayun pa nga ginabulong sa hospital.
