ILOILO CITY – Indi ma-angut sa isyu sang Martial Law ang pagtudlo sang first lady nga si Atty. Louise “Liza” Cacho Araneta-Marcos sa College of Law sang West Visayas State University (WVSU).
Ini ang suno kay Iloilo City Mayor Jerry Treñas.
Sa interview sang Bombo Radyo kay Treñas, iya ginpahayag nga sang tion pa sang kampanya, nakamuno sa iya ang first lady nga nagaplano ini nga magtudlo sa isa ka law school sa syudad.
Si Marcos ang may yara sang pamilya sa syudad kag mga nabilin nga roots.
Wala man sang may nakita nga problema si Treñas bangud nga kwalipikado man ini nga magtudlo sa law school.
Samtang, sa huring-huring nga nagaplano ang first lady nga magpadalagan sa syudad, suno sa alkalde, ina ang indi pa mahibaluan.
Ang pagtudlo ni Marcos ang nag-ani sang madamo nga mga negatibo nga komento kag pagpamatuk nagikan sa mga estudyante kag nagkalain-lain nga organisasyon sa amo nga unibersidad bangud sa isyu sang Martial Law.
Suno kay Treñas, indi niya makita ang koneksyon sini sa Martial Law bangud nga ang ugangan sang first lady nga si anay Presidente Ferdinand Edralin Marcos, Sr. ang nagpatuman sini nga nagpatay sang madamo nga tawo kag ginapahayag nga nagkawat sang tuman ka dako halin sa kaban sang gobyerno.
Dugang pa sang alkalde, mas bentaha ini bangud nga sa pagtudlo sang first lady sa WVSU, makita niya ang sitwasyon sang syudad kag mahimo nga may yara pa ini sang mahatag nga bulig.
Sa interview naman sang Bombo Radyo kay Iloilo Governor Arthur Defensor, Jr., iya ginpahayag nga maayo gid ini nga development bangud mismo ang first lady ang imbolbado sa mga state universities and colleges (SUC).
Suno pa sa gobernador, sa tion nga may yara sang problema sa mga SUC, mapalab-ot sa gilayon sa first lady.
Ang first lady ang isa ka practicing lawyer kag makadugang sang kalidad sang mga faculty diri sa syudad.
Sa isyu sa Martial Law kag sa eleksyon, suno sa gobernador, indi nagakadapat nga paminsaron ang amo nga mga butang bangud nga natapos na ang pinili-ay kag serbisyo publiko naman ang tutukan.
Ang importante suno sa iya amo nga dako ang mabulig sang first lady sa mga SUC.
Sa subong, kinahanglan gid ang dugang nga mga professor sa mga law schools kag dako ang mabulig sang first lady.
Sa pagkamatuod suno sa gobernador, siya mismo ang gusto man nga magbulig sa pagtudlo apang bilang isa ka local chief executive, indi na niya ini nga mahimo.
