ILOILO CITY – Ginaduso sang animal welfare advocates ang pagtukod sang Barangay Animal Welfare Enforcement Team agud nga masolbar ang problema tuhoy sa nagadamu nga layaw nga ido sa syudad sang Iloilo.
Sa interview sang Bombo Radyo kay Norman Marquez, senior animal welfare advocate, iya ginpahayag nga ginaduso nga sa Brgy. Bolilao sa distrito sang Mandurriao una nga magpatukod sang Barangay Animal Welfare Enforcement Team.
Suno kay Marquez, wala pa sang petsa kun san-o ini maumpisahan bangud nga kinahanglan pa niya nga magpakig-angot sa Barangay Council kag sa Iloilo City Government kun ano ang mangin plastada.
Ginpahayag ni Marquez nga bangud nga wala pa nakaayo ang dog impounding area sa City Veterinary Office, kinahanglan gid nga may yara sang Barangay Animal Welfare Enforcement Team.
Kun madayon, ginpahayag ni Marquez nga wala sang pag-impound nga matabo kag sa baylo, multahan ang pabaya nga dog owner kag kun sulit-sulit na lang ang violation, pagkapreso ang mahimo nga isilot.
