ILOILO CITY-– Wala nakapangayo sang pahanugot ang Iloilo City Government sa Iloilo City Heritage and Conservation Council (ICHCC) antes gintukod ang Childrens playground sa pila ka mga plaza sa Syudad sang Iloilo.
Sa interview sang Bombo Radyo kay Dra. Kristine Gaona Treñas, pinuno sang ICHCC ,iya ginpahayag nga bisan wala naglisensya kuntani nagpakig-angot man lang sa ila ang city government antes gintukod ang mga childrens playground.
Suno kay Dra. Treñas, ang ginlisensya lang sa ila amo ang pag-ilis sang bastketball board sa Molo Plaza apang ginkakibot nila nga may yara sang childrens playground kag nainagurahan na ini.
Ginklaro man niya nga wala man sang may nalapas ang pagtukod sang nasambit nga playgrounds bangud indi man ini permanent structures nga may yara sang mga atop kag iban pa apang kuntani may yara lang sang masterplan kag indi lang magpinagusto sa pagpamutang sang structures.
Nahibaluan nga magluwas sa Plaza Libertad, may yara man sang ginpatukod nga childrens playground sa distrito sang Molo, Jaro kag iban pa nga plaza sa palibot sang Syudad sang Iloilo.
