ILOILO CITY – Nagsugod na ang pagpatukod sang P52 million Double A slaughterhouse sa Sitio So-oc, Barangay Lambuyao, Oton Iloilo.
Katuyuan sang amo nga proyekto nga mapanami ang kalidad sang meat handling kag mabatu-an ang makalalaton nga African Swine Fever nga nag-apekto sa ekonomiya sang probinsya.
Ini ang sa idalom sang supervision sang Iloilo Provincial Government pinaagi sa Provincial Engineer’s Office.
Sa interview sang Bombo Radyo kay Engr. Romeo Andig, pinuno sang amo nga opisina, iya ginpahayag nga ang pondo sa proyekto ang nagikan sa Philippine Rural Development Program sang Department of Agriculture sa idalom sang I-BUILD component.
Naghatag man ang probinsya sang P8.758 million agud nga makumpleto ang funding requirement.
Suno pa kay Engr. Andig, sa tion nga mangin operational na ang slaughterhouse sa Pebrero 2024, ginalauman nga ini ang magasuporta sa swine kag meat industry sa probinsya sang Iloilo.
Masarangan sang facility nga mag-ihaw sang 16 ka baboy sa isa ka oras kag 12 ka mga baka sa isa ka adlaw.
Lakip sa mga component sang facility amo ang holding pen, waste treatment facilities, boiler room, elevated water tank, rainwater harvester, concrete pavement, drying area, kag iban pa.
