ILOILO CITY – Ginkalipay sang local government unit (LGU) sang Dueñas, Iloilo ang pagtukod sang pinakauna nga seismic station sa probinsya sang Iloilo sa Central Azucarera de San Antonio, Inc. (CASA) sugarcane plantation sa Brgy. Ponong Pequeño sa nasambit nga banwa.
Sa interview sang Bombo Radyo kay Dueñas, Iloilo mayor Mamerto Pelopero III, iya ginpahayag nga proud gid ang ila banwa sa pag-host sang Dueñas Iloilo Seismic Station to the Philippine Seismic Network.
Ang nasambit nga station ang ika-115 na nga seismic station sa pungsod suno sa Department of Science and Technology-Philippine Institute of Volcanology and Seismology (DOST-Phivolcs).
Ang bag-o nga seismic station ang makabulig agud nga mas mapadasig kag mangin accurate ang issuance sang impormasyon nahanungod sa nagakatabo nga linog.
Makabulig ini sa mga decision makers, sa mga emergency responders kag sa publiko.
