ILOILO CITY – Ginaduso ni Iloilo 4th District Provincial Board member Rolando Distura ang pagpatindog sang evacuation centers sang mga sapat sa tion sang kalamidad sa tagsa ka mga barangay.
Sa ginpatigayon nga regular session sang 14th Sangguniang Panlalawigan, gin-introduce ang proposed Provincial Ordinance Number 2022-09-10 ukon ang Iloilo Center for Animal Rehabilitation and Evacuation (I-CARE).
Sa interview sang Bombo Radyo kay Board Member Distura nga amo man ang chairman sang Committee on Disaster Risk Reduction and Management sa Sangguniang Panlalawigan, ini ang may katuyu-an nga mahatagan sang proteksyon ang mga sapat ilabi na ang mga companion pets sa tion sang kalamidad.
Naobserbaran niya nga masami nga ginabilin ang mga hinuptanan nga mga sapat sa ila panimalay sa tion sang evacuation kadungan sang mga kalamidad kag wala ginahatagan sang prayoridad ang kabuhi sang mga sapat sa tion sang rescue operations.
May mga tinion man nga nagapang-alang-alang ang mga residente nga maghalin sa ila panimalay apisar sang order nagikan sa local government unit bangud nga ginakabalak-an nila ang ila nga mga sapat kag may yara man nga ginasulay ang malain nga tyempo agud lang nga makabalik sa panimalay kag maluwas ang ila sapat nga nagabutang naman sang ila kabuhi sa delikado.
Bangud sini, ginaduso ni Distura nga magpatindog sang evacuation center ang mga barangay sa probinsya agud nga mag-shelter sang mga sapat.
Ginaduso man nga dapat malapit ini sa mga evacuation center para sa mga tawo.
Samtang, sa iban pa nga sapat kaangay sang baka kag baboy, ginalantaw man sang board member nga mahatagan sila sang lugar nga indi delikado para sa ila.
