Pagabug-osan sang tatlo ka mga myembro ang fact-finding committee nga pagatukuron sang Iloilo Provincial Government may kaangtanan sa reklamo ni Iloilo City Councilor Nene De la Llana batuk kay Public Information and Community Affairs Office (PICAO) head Nereo Lujan.
Sa inisyal nga impormasyon, ang tatlo ka mga myembro ang lunsay abogado halin sa nagkalain-lain nga opisina.
Sa interview sang Bombo Radyo kay Atty. Dennis Ventilacion, Iloilo Provincial Legal Officer, iya ginpahayag nga may draft na sang executive order para sa pagtukod sang fact-finding committee kag yara na ini sa opisina ni Iloilo Governor Arthur Defensor Jr. para sa pag-apruba.
Suno kay Ventilacion, sa tion nga ma-endorso na ang mandu sa ila opisina, pangabayon niya sa chairperson sang komitiba nga magtipon agud opisyal nga maumpishan ang ila trabaho.
Ang fact-finding committee ang magatipon sang mga kamatuoran kag sirkumstansya may kaangtanan sa reklamo ni De la Llana, lakip ang sabat nga ginpasa ni Lujan.
Pagkatapos, magahimo ang komitiba sang report kag rekomendasyon sa gobernador kun ano ang dapat nga masunod nga tikang.
Ginpaatahg ni Ventilacion nga kun indi bastante ang ebidensya, mahimo irekomenda ang pag-dismiss sang reklamo.
Apang, kun may bastante nga ebidensya, mahimo magpasaka ang gobernador sang pormal nga kaso kag magtukod sang separado nga investigating committee.
Dugang pa ni Ventilacion, indi pa mapat-od kun ano kalawig ang imbestigasyon nga himuon bangud nakadepende ini sa mga kinahanglanon sang nagreklamo kag ginareklamo agud mapresentar ang ila tagsa ka bahin.
