Dako ang pagpati sang 1Sambayan nga mapirdi nila ang Partido Demokratiko Pilipino-Lakas ng Bayan (PDP-Laban) ni Presidente Rodrigo Duterte pinaagi sa pagtukod sang mas mabaskog nga coalition.
Ang 1Sambayan ang ginabug-usan sang broad coalition groups nga ‘pro-democracy’ nga ginlunsyar kahapon nanday retired Supreme Court Justice Antonio Carpio, anay Ombudsman Conchita Carpio-Morales, kag anay Foreign Affairs Secretary Albert Del Rosario.
Ang convenors naman sang 1Sambayan ang ginalakipan nanday retired Associate Justice Conchita Carpio-Morales, former Foreign Affairs Secretary Albert Del Rosario, former Education Secretary Armin Luistro, Jesuit priest Fr. Albert Alejo, retired Rear Admiral Rommel Ong, former Negros Occidental Governor Rafael ‘Lito’ Coscolluela, former Commission on Audit Commissioner Heidi Mendoza, former lawmaker Neri Colmenares, Atty. Howard Calleja, Partido ng Manggagawa’s Rene Magtubo kag Ricky Xavier.
Sa interview sang Bombo Radyo kay anay Bayan Muna Representative Atty. Neri Colmenares, iya ginpahayag nga isa ka mayor nga katuyuan sang coalition amo ang magtukod sang isa ka slate sang national candidates.
Suno kay Colmenares, nagpanguna sa ila ginakonsidera nga mag-upod sa 1Sambayan, amo sanday Vice President Maria Leonor G. Robredo, Manila Mayor Francisco M. Domagoso, Senators Nancy Binay-Angeles kag Sen. Poe-Llamanzares.
Gin-ako ni Colmenares nga ang ginapili nila nga mangin kabahin sang ila coalition nga aspirants amo ang may matinlo nga track record, may hugot nga panindugan sa mga mayor nga isyu sa sosyudad, may plataporma, kag competence.
Sa tion nga magapadalagan suno kay Colmenares ang ila napilian nga mga kandidato, magalunsyar sila sang online poll kag group surveys.
Magluwas diri suno sa natungdan, sa tion nga may ara na sang shortlist sang mga kandidato santo sa resulta sang online kag group surveys, pagabotohan man nila ang ila luyag nga kandidato.
Dugang pa ni Colmenares, madamo na sang naga-antos sa idalom sang administrasyon ni Duterte gani nagakadapat lamang nga tinguhaan nila nga mapauntat na ang pag-antos sang pungsod.
”Kinahanglan maka-unify ang opposition para makadaog sa 2022…Ang resolution sang 1Sambayan, indi na pwede nga mag 6 years na naman under Presidente Duterte kay grabi nga pag-antos na ang aton nabatyagan sa lima ka-tuig nga pagdumala niya sa Pilipinas…”
Matandaan nga una na ginpahayag ni Retired Supreme Court Justice Antonio T. Carpio, nga magadaog lamang sila kun maghugpong ang tanan nga oposisyon.
Ginpahayag ni Colmenares nga indi na niya luyag nga masulit pa ang natabo sang 2016 presidential elections sa diin natunga ang boto nanday independent candidate Poe-Llamanzares kag administration candidate Mar A. Roxas II nga nagresulta sang pagkalutos nila kay Duterte.
