ILOILO CITY- Madayon na gid ang pagpatindog sang oil depot sang Grayhorse Energy Inc. sa 10-ektaryas nga lote sa Talusan, Dumangas, Iloilo sa pihak sang pagpamalabag sang pila ka stakeholders.
Sa interview sang Bombo Radyo kay Dumangas Mayor Ronaldo Golez, iya ginpahayag nga aprubado na sa Sangguniang Bayan ang amo nga proyekto.
Suno kay Golez, nag-agi ini sa husto nga proseso kaangay sang public hearing kag sa subong, ginahulat nalang nga ma-comply sang amo nga kompaniya ang iban nga ginakinahanglan nga mga permits agud maumpisahan na ang amo nga proyekto.
Matandaan nga hugot nga ginabalabagan sang Iloilo Fish Producers Association sa pagpamuno sang presidente nga si Tomas Hautea ang amo nga proyekto bangud sa kahangawa nga sa tion nga magleak ang pipe sang oil depot kag magkadto sa dagat,pat-od nga madulaan sang palangabuhian ang madamo nga mga fisherfolks.
Mangin ang Bureau of Fisheries and Aquatic Resources ang nagpahayag man sang pagpamatok sa proyekto apang suno kay Golez, kon basehan ang Local Government Code, may poder ang isa ka Local Government Unit sa pagdesisyon sa mga proyekto nga luyag sini pasudlon ukon ipatuman sa ila banwa.
