Liwat nga ginbuyagyag ni Antique Governor Rhodora Cadiao nga magapapili ini sa pagka-congresswoman sang Antique sa palaabuton nga 2025 midterm elections.
Sa interview sang Bombo Radyo kay Governor Cadiao, iya ginpahayag nga ang magapadalagan bilang gobernador kaupod siya, amo si Department of the Interior and Local Government (DILG) Undersecretary kag former Pandan Mayor Jonathan Dioso Tan samtang ang magapadalagan naman bilang bise-gobernador amo si former Caluya Mayor Genevive Lim – Reyes.
Suno kay Cadiao, isa sa nagtulod sa iya nga mangin congresswoman amo ang handom sang Antiqueño nga tungaon ang probinsya sa duha ka Distrito.
Gintul-id man sini nga ang walo ka mga Sangguniang Bayan Members sang probinsya nga sa subong, suspendido ang posible nga magapasakop sa piyak nga linyada.
Apisar sini, ginpabugal sang gobernadora ang mga kadungganan nga nakuha sang Antique sa idalum sang iya nga pagpamuno.
Proud man ang natungdan nga ipadayaw nga wala nagakaulihi ang probinsya sa rice production kag sa patag sang Gross domestic product (GDP) sa bug-os nga Western Visayas.
