ILOILO CITY- Nagsentro sa pagtuo bilang dako nga regalo sang Diyos ang homily ni Jaro Archbishop His Grace, Most. Rev. Jose Romeo O. Lazo, D.D. sa misa nga ginpatigayon sa Jaro Metropolitan Cathedral may kaangtanan sa ika-500 nga anibersarsyo sang Kristiyanismo sa Pilipinas.
Suno kay Archbishop Lazo, ini nga regalo ang gindala lima ka gatos ka tuig na ang nakaligad nga dapat naton pasalamatan.
Ginpahayag sang arsobispo nga kadungan sang selebrasyon nga dala sang sini nga regalo amo ang katungdanan nga ipakigbahin man ini sa iban.
Para sa arsobispo, ang tagsa kay Kristiyano nga ginbunyagan ang may papel bilang misyonero nga amo ang magapalapnag sang sini nga pagtuo nga regalo sang Amay sa langit.
