Ginpauntat anay ang pagturn-over sang mga balay sa Uswag Subdivision,San Isidro, Jaro, Iloilo City.
Ini matapos nagkinagamo ang mga pumuluyo sang may nag-okupa nga ginapahayag benepisyaryo sang Iloilo City Urban Poor Affairs office (ICUPAO) sa mga balay nga gin-award sadto sang Department of Social Welfare and Development (DSWD).
Sa interview sang Bombo Radyo Iloilo kay Punong Barangay Felix Doreza, iya ginpahayag nga wala anay ginpadayon sang ICUPAO ang pagturn-over sang balay sa kapin pito pa kuntani nga mga awardees sang ICUPAO.
Matandaan nga ginkakibot sang okupante nga si Pacita Madrigal nga gin-istaran na ni Aisa Rica Dela Gente ang iya balay kag ara na sa gwa ang iya mga gamit.
Nanindugan si Madrigal nga legal ang iya pag-istar sa balay samtang ginpahayag man ni Dela Gente nga ang ICUPAO mismo ang naghatag sa iya sang certification agud mag-istar na sa nasambit nga balay.
