ILOILO CITY- Nagpalab-ot sang pagpasalamat sa Bombo Radyo ang homeowners association sang Decahomes Subdivision, Pavia, Iloilo bangud sa nahimo nga mihura matapos gindala sa kahanginan ang ila reklamo batok sa mahigko nga tubig nga gina-supply sang BP Waterworks, Inc.
Sa interview sang Bombo Radyo kay Ana Dajay, presidente sang homeowners association, iya ginpahayag nga dako nga bulig nga gintutukan sang Bombo Radyo ang isyu sa ila lugar nga nagresulta man sa paghatag sang igtalupangod sang Local Government Unit sang Pavia sa sentimento sang pumuluyo.
Suno kay Dajay, nakapatigayon na sang legislative meeting ang Sangguniang Bayan sang Pavia sa diin nadihon ang mga rekomendasyon para mas mapaayo pa ang serbisyo sang BP Waterworks.
Matandaan nga nag-angkon sang balatian kaangay sang arikis kag amoeba ang mga pumuluyo sang nasambit nga subdivision bangud sa mahigko nga tubig nga nagatubod sa ila gripo.
