ILOILO CITY- Ginapaluya sang nagakatabo nga kalakasan kag pagpang-harass batok sa mga abogado ang sistema sang hustisya sa Pilipinas.
Ini may kaangtanan sa natabo nga pagbuno sa human rights lawyer nga si Atty. Angelo Karlo Guillen, ang Asst. Vice President sang National Union of Peoples Lawyers( NUPL)-Visayas.
Sa interview sang Bombo Radyo kay Senate Minority Leader Franklin Drilon, iya ginpahayag nga bangod sa pagpamatay sa mga abogado, mga huwes, ukon sa mga prosecutors, mahimo nga wala na sang mga abogado nga magadepensa kag maga-enforce sang layi.
Suno sa Ilonggo nga senador, isa ka rason sang mga kalakasan batok sa mga abogado amo ang nagakatabo nga red- tagging kag ini ang hugot niya nga ginakondena.
Kaangot sini, tinguhaan sang natungdan ng umpisahan ang proseso sang pagbalay sang layi nga magasilot sa akto sang red tagging kag sa mga tawo sa likod sini.
