Nagapati ang isa ka political analyst nga ang pagguba sa mga kandidato kag kaalyado ni Presidente Rodrigo Duterte sa eleksyon ang motibo sa pag-pagwa sang duha ka kontrobersyal nga “Ang Totoong Narcolist” video.
Sa una nga video, ginatum-ok sang nagpakilala nga si “Bikoy” si anay Davao City Vice Mayor Paolo ‘Polong’ Duterte nga involved sa illegal drug syndicate.
Samtang sa ikaduha nga video, ginatudlo ang common law wife sang Presidente nga si Honeylet Avanceña sang Arevalo, Iloilo City nga isa sa mga principal sang sindikato.
Sa interview sang Bombo Radyo kay Mr. Ramon Casiple, executive director sang Institute for Political and Electoral Reform (IPER) iya ginpahayag nga apisar wala man nagapadalagan sanday Avanceña kag Polong, apang palaagyan ini agud maguba ang ila pangalan.
Sa sini nga pamaagi suno pa kay Casiple, maguba man ang kredibilidad sang mga kaalyado sang pamilya sang presidente.// Dugang pa ni Casiple, mahimo target sang utok sa likod sang nasambit nga video ang mga kilala nga personalidad nga tampad ang suporta sa anti-drug campaign sang Duterte Administration.
Partikular nga gintumod sang natungdan si anay Philippine National Police (PNP) General Bato dela Rosa nga nagapadalagan sa pagka-Senador sa nagahilapit nga midterm election.
Samtang, ginpahayag ni Casiple nga kwestyonable ang kredibilidad sang mga dokumento nga makit-an sa video bangud suno sa iya madali lang mag-imbento sang kaangay nga mga papeles.
