Makabig nga threat suno kay President Ferdinand Marcos Jr., ang nangin pahayag ni Chinese Ambassador Jing Quan nga wala sang ibato ang pungsod kun paggamitun sang China ang ila nga pwersa.
Suno kay Marcos, luyag niya ini nga istoryahan kaupod si Quan, agud mahibaluan kun ano ang luyag nga ipalab-ot sang Chinese ambassador sa mga Pilipino.
May kaangtanan ang nangin reaksyon ni Quan sa pahayag ni Defense Secretary Gibo Teodoro nga “troublemaker” ang Beijing, China sa West Philippine Sea nga ginpanginwala man sang ambassador.
Giklaro naman sang Malacañang pinaagi kay Palace Press Officer Undersecretary Claire Castro nga luyag lamang ipatawag ni President Marcos si Quan para sa isa ka diskusyon, ilabi na nga luyag lang maprotektahan sang Presidente ang interes sang pungsod kag agud indi man maapektuhan ang relasyon sang Pilipinas sa trade and investment sang China.
Nahibaluan nga kahapon nga adlaw, nagpahayag man ang Chinese Embassy in Manila nga handa gid nga makipagdiskusyon si Quan sa presidente agud maisturyahan ang mga isyu nga ginapangatubang sang duha ka pungsod.
