ILOILO CITY – Ipatuman na sa Mayo 15 ang ‘Paid Parking Ordinance’ sa pila ka mga lugar sa Iloilo City Proper.
Sa interview sang Bombo Radyo kay Maricel Mabaquiao, pinuno sang Local Economic and Enterprise Office, iya ginpahayag nga sakop sang ordinansa ang mga dalanon sa syudad nga ginalakipan sang Aldeguer, Arroyo, Arsenal, Solis, Peralta, Guanco, kag porsyon sang Ortis Street.
Suno kay Mabaquiao, magaumpisa ang pagpanukot sang mga ini ‘las 8:00 sa aga tubtob ‘las 5:00 sa hapon.
Nahibaluan nga ang Local Economic and Enterprise Office lang ang otorisado nga magsukot sang parking fee sa mga motorista, samtang ang Public Safety and Transportation Management Office naman ang magapanguna sa pag-monitor sa mga motorista nga nagalapas sa ordinansa.
Ginpahayag dugang sang natungdan nga mahimo magbayad ang sakay sang motorsiko sang P15 sa una nga duha ka oras nga pag-park, P20 sa tricycle, P25 sa mga light vehicles kaangay sang sport utility vehicle, kag P30 sa mga medium vehicle kaangay sang Medium-Duty Trucks.
Samtang, may dugang nga P5 naman sa mga succeeding hours sang parking.
Diri na kag butangan sang ticket ang mga salakyan kun sa diin nakasaad ang oras sang pag-park bilang basehan sang parking fee.
Hilway naman sa pagbayad sang parking fee ang mga government employees.
Sa subong, nagapadayon ang pagpalapnag sang impormasyon sang Local Economic and Enterprise Office sa mga motorista.
