Na-recover na sang team sang National Bureau of Investigation (NBI) ang 88-anyos nga painting sang national artist nga si Fernando Amorsolo nga ginkawat anay sa museum sa Silay City, Negros Occidental sang Hulyo 3.
Ini nga “Mango Harvesters” painting ang gindala na sa National Museum kag na-authenticate na.
Suno sa NBI, duha ka suspek ang naaresto sang ila gintilawan nga ibaligya ang painting sa Quezon City.
Ginapahayag nga nakabaton sang impormasyon ang otoridad nga ibaligya sang certain “Atty. Ching” ang painting sa balor nga P3.5-million.
Sa entrapment operation, nadakpan ang mga suspek sang ila na ginadul-ong ang painting kasunod sang instructions halin kay “Atty. Ching”.
Natalana nga mag-atubang ang mga suspek sa kaso nga possession kag pagbaligya sang stolen property nga isa ka paglapas sa Anti-Fencing Law.
Ang “Mango Harvesters” ang kabahin anay sang Hofileña Museum’s collection. Ini nga museum amo ang heritage house nga gintukod sang 1934 ni late Manuel Severino Hofileña at Gilda Ledesma Hojilla. Diri nakabutang ang pribado nga mga koleksyon sang mga obra-maestra sang renowned Filipino artists kaangay kanday Amorsolo, Juan Luna, kag Felix Resurreccion Hidalgo.
