May igabutang nga graphic health warnings sa pakete sang electronic cigarettes kag vapes nga ibaligya sa mga physical kag online stores sa Pilipinas.
Ini kaangay sa nakabutang sa mga suludlan sang sigarilyo agud nga indi ma-engganyo ang mga Pinoy ilabi na ang mga kabataan nga gamiton ini nga makahalalit nga mga produkto.
Suno sa Department of Health (DOH), ini nga polisa ang mangin epektibo sa Mayo 12 kag para ini sa tanan nga vaporized nicotine kag non-nicotine products kag novel tobacco products lakip na ang vapes.
Suno pa sa health agency, ang graphic warnings ang halos katunga gid sang packaging material sang vapes.
Makit-an diri ang halit nga matuga sa lawas kun padayon ang paggamit sa nasambit nga produkto.
Sa idalom sang RA 11900 ukon ang Vaporized Nicotine and Non-Nicotine Products Regulation Act, ang duly registered e-cigarettes kag vape products nga may applicable GHWs amo lamang ang pahanugutan nga ibaligya, i-advertise, kag i-distribute sa pungsod.
Ang manufacturers, distributors, importers kag retailers sang vaporized nicotine kag non-nicotine products kag novel tobacco products nga indi makasunod sa layi ang mahimo mapreso sang tubtub anum ka tuig kag posible nga dagdagan sang multa nga P5 million.
