ILOILO CITY-Nagapadayon subong ang ginapatigayon nga contact tracing matapos nagpositibo sa Coronavirus disease 2019 (COVID-19) ang isa ka Pakistani nga misyonaryo.
Sa interview sang Bombo Radyo Iloilo kay Mr. Jeck Conlu, tagpamaba sang COVID Team sang Iloilo City Government, iya ginpahayag nga ang nasambit nga Pakistani missionary ang nagatinir sa Mill Hill Missionaries Central House sa Avanceña Street, Molo, Iloilo City.
Suno kay Conlu, Agusto 17 pa nagpatigayon sang retreat ang pasyente kaupod ang mga madre.
Pahayag ni Conlu, may direct exposure man ini sa duha ka pari kun sa diin ang isa sa mga ini ang nagpauli pa sa Probinsya sang Antique kag ang isa naman ang yara sa Mill Hill Central House.
Ginkumpirma naman sang punong barangay sang Brgy. Airport, Mandurriao, Iloilo City nga nakapadulong pa sa ila barangay ang nasambit nga Pakistani.
Sa interview sang Bombo Radyo kay Punong Barangay Benjie Macailing, iya ginpahayag nga regular nga nagapatigayon sang community outreach sa lugar ang misyonaryo.
Suno kay Macailing, gin-isolate na ang Mill Hill Formation House sa nasambit nga barangay.
Nagpasalig naman ang talatapan sang Mill Hill Formation House sa R. Mapa St., Brgy. Airport, Mandurriao, Iloilo City, nga nagasunod sila sa tanan nga protocol matapos na-expose sa COVID-19 positive nga Pakistani missionary.
Sa impormasyon nga eksklusibo nga nakuha sang Bombo Radyo sa tagpamaba sang Mill Hill Formation House, ginpahayag nga 20 ang naka-isolate sa amo nga lugar.
“Very cooperative” suno sa natungdan ang kada isa sa ila talatapan may kaangtanan sa ginapatigayon nga mga pagsulundan.
