ILOILO CITY- Naaresto na ang Pakistani nga ginatudlo nga amo ang responsable nga nagpatay sa isa ka Overseas Filipino Worker sa Dubai, United Arab Emirates.
Ang bangkay sang nasambit nga 32-anyos nga Pinay ang nasapwan nga nasulod sa maleta kag nahal-id sa idalom sang taytay sa Palm Island sa Deira.
Suno kay Bombo International Correspondent Jonelyn Jardeleza direkta sa Dubai, nag-ako ang amo nga Pakistani nga siya ang nagpatay.
Ginpahayag ni Jardeleza nga base sa impormasyon, may relasyon ang duha kun sa diin nag-ugat ang krimen sa away sang nangayo sang kwarta ang Pinay agud mag-renew sang iya visit visa.
Suno pa kay Jardeleza, didto kag ginkuga sang suspek ang biktima gamit ang tela antes ginsulod sa maleta kag ginhaboy.
Nagapakig-angot naman ang Philippines Embassy sa Abu Dhabi sa pamilya sang OFW kag may yara na sang abugado nga nagauyat sang kaso.
