Tuman ang nabatyagan nga kalipay sang pamilya Bataican sa Iloilo City sa kadalag-an ni Melchor III Bataican matapos nakakuha sang gold medal sa Palarong Pambansa 2025.
Si Melchor III ukon mas kilala sa hayo nga “Thirdy” ang gold medalist sa doble baston individual sa elementary level.
Sa interview sang Bombo Radyo kay Melchor Bataican Jr., amay ni Thirdy, iya ginpahayag nga Grade 4 pa lang ang iya anak sang nadiscover sang iya coach nga may abilidad ini sa arnis.
Suno sa amay nga Bataican, nagalaum sila nga mapadayon sang iya anak ang hilig sa sini nga sport tubtob sa pag-abot sini sa sekondarya.
Si Thirdy ang yara na subong sa Grade 6 sa Graciano Lopez Jaena Elementary School sa La Paz.
Gintuad naman sang amay sang gold medalist nga ginalantaw man nila nga mangin isa man ka arnis player ang utod ni Thirdy nga si Naruto nga subong nagaedad palang sang duha ka tuig.
Suno naman kay Ofelia Bataican,lola ni Thirdy, nakit-an niya kun paano magdedikar ang iya apo sa training bangud wala ini nagatambong sa mga birthday parties kag wala man nagalagaw para maka-focus sa iya training.
Ang pamilya Bataican ang pumuluyo sang Jereos, La Paz, Iloilo City.
