Nagpalab-ot sang simpatiya ang Palasyo sa kamatayon ni anay Department of Public Works and Highways (DPWH) undersecretary Catalina Cabral.
Napatay si Cabral matapos ginaalegar nga nahulog sa pil-as sa Kennon Road sa Benguet kahapon nga adlaw, Huwebes, Disyembre 18.
Sa press briefing subong nga adlaw, ginpahayag ni Palace Press Officer Usec. Claire Castro nga makahalanusbo ang natabo kay Cabral.
Gin-athag man ni Castro nga wala subong sang kaso batok kay Cabral sa pihak sang pagka-involve sini sa flood control scandal.
Dugang pa niya, yara sa Philippine National Police (PNP) kag sa Scene of Crime Operations (SOCO) ang mandato sa imbestigasyon sa insidente.
Samtang, ginmando naman ni PNP acting chief Police Lieutenant General Jose Melencio Nartatez Jr. nga kabigon nga person of interest ang driver ni Cabral.
Matandaan nga base sa inisyal nga imbestigasyon sang mga otoridad, padulong si Cabral sa La Union apang pag-abot sa Maramal, Camp 5, Camp 4 nagpabilin ini pasado ‘las tres sang hapon kahapon kag naghambal sa iya driver nga ibilin lang siya didto.
Ginbalikan ini sang driver pasado ‘las-5 sang hapon kag wala na niya makita ang anay DPWH official.
Dugang pa sa imbestigasyon, pag-abot sang ‘las-7 sang gab-i nagpabulig na ang driver sini sa kapulisan kag didto nakita nga wala na sang kabuhi si Cabral sa idalom sang 30 metro nga pil-as.
