ILOILO CITY – Nagdepensa si Punong Barangay Allan Juarez matapos ginpatyan sini sang sound system si Iloilo City Lone District Representative Juliene ‘Jamjam’ Baronda kadungan sang pagbisita sini sa Barangay Pali Benedicto, Mandurriao, Iloilo City.
Si Baronda ang gin-imbitar ni Kagawad Romina Gratis nga magtambong sa TikTok Challenge, sa diin kabahin ini sang ila annual fiesta.
Sa interview sang Bombo Radyo kay Punong Barangay Juarez, iya ginpahayag nga wala siya sang ihibalo nga gin-imbitar ni Kagawad Gratis si Rep. Baronda.
Suno kay Juarez, nagapakita nga wala siya ginrespeto ni Kagawad Gratis bangud wala gid siya nagapirma sa anuman nga imbitasyon para sa kongresista.
Gin-athag sang Punong Barangay nga wala siya nagapamalabag nga magpadulong si Rep. Baronda sa ila lugar apisar nga nagasuporta siya kay Iloilo City Mayor Jerry Treñas.
Nahibaluan nga natapos na ang event sang nag-abot ang kongresista apang sang matapos ini sang iya speech, naghatag ini sang kahigayunan nga magsaot kaupod ang mga opisyales kag participants sang TikTok Challenge.
Samtang nagasaot, nag-abot si Punong Barangay kag deretso nga nagpadulong sa sound operator kag ginpapatay ang musika.
Diri kag nagbais na si Kagawad Gratis kag si Punong Barangay Juarez.
Mangin ang utod ni Kagawad Gratis nga si anay Barangay Kagawad Mona Rose Gratis nga staff subong sang kongresista ang ginsukmaan man ni Punong Barangay Juarez.
Gilayon naman nga nagpauli si Rep. Baronda matapos magluntad ang indi pag-intindihanay sa tunga sang mag-utod nga Gratis kag sa punong barangay.
