ILOILO CITY – Indi pa sirado ang PALIBOSFER case suno sa Iloilo Police Provincial Office.
Matandaan nga subong nga adlaw, Setyembre 14, nagsukat ang natabo nga pagpangluthang sa Villa Panian, Estancia, Iloilo sa diin tatlo ka mga mag-abyan ang ginpamatay.
Ang mga biktima amo sanday Chrysler Floyd Fernandez, residente sang Jereos, La Paz, Iloilo City; John Paul “JP” Mark Bosque sang Lopez Jaena Sur, La Paz, Iloilo City; kag Mark Clarenz Libao sang Tacas, Jaro, Iloilo City.
Ang mga ginpasakaan sang three counts of murder amo sanday Jevron Parohinog nga lone survivor sa krimen, utod sini nga si Jix Parohinog, Michael Porras, Michael Quiatchon, Benzen Llamado, kag anum ka mga John Does.
Sa interview sang Bombo Radyo kay Police Major Rolando Araño, spokesperson sang Iloilo Police Provincial Office, iya ginpahayag nga nagahulat pa sila sang sabat sang Department of Justice sa ginpasa nga petition for review sang Special Investigation Task Group PALIBOSFER upod sa pamilya sang mga biktima.
Suno kay Araño, samtang nga wala pa ang sabat sang Justice Department, nagapabilin nga hilway si Parohinog bangud nga wala man ini sang kaso.
Pahayag ni Araño, magadepende sa sabat sang Department of Justice ang masunod nga tikang sang Iloilo Police Provincial Office.
Kung madumduman, base sa gina-uyatan sang Bombo Radyo Iloilo nga desisyon ni Assistant Provincial Prosecutor Ronilo Pamonag kag aprubado ni Provincial Prosecutor Ma. Elena M. Hofileña-Gerochi, wala nakitaan sang meritorious ground agud nga magpadayon ang kaso kag magpatigayon sang preliminary investigation.
Napaslawan nga mag-present sang eyewitness ukon ebidensya ang mga complainants nga maka-angut sa mga respondents ukon sa mga ginpasakaan sang kaso sa kamatayon sang tatlo ka mga mag-abyan.
Dugang pa sang Provincial Prosecutor’s Office, sa tion nga ginkuhaan sang pahayag si Jevron Parohinog, wala nasunod ang constitutional requirements.
Ginhimo ini apisar nga wala sang counsel nga naga-assist kay Parohinog.
Sa amo man nga desisyon, ginpahayag sang prosecutor nga ang mga affiants nga sanday Kagawad Rene Barbacion kag security guard nga si Reynante Santiago ang wala direkta nga nakakita sang krimen gani, indi ini makabig nga sufficient evidence.
Bangud nga wala sang nagaka-igo nga ebidensya ang mga complainants, suno sa prosecutor, naghimo sila sang dugang nga mga ebidensya pinaagi sa pagkuha sang pahayag sang pamilya kag kakilala sang mga biktima nga nagatudlo nga may yara sang utang sa biktima ang mag-utod nga Parohinog.
Mahimo nga makabenepisyo sila sa kamatayon sang mga biktima apang ang proof of motive ang indi maka-establish sang guilt suno pa sa desisyon.
Sa iban nga mga ginpasakaan sang kaso, wala sang mabaskog nga ebidensya nga maka-angut sa ila kahilabtanan.
Dugang pa, ang nagalain-lain nga pahayag ni Jevron Parohinog ang indi makaserbe nga basehan agud nga ma-indict ini.
Indi man klaro kun sa diin natabo ang krimen gani, indi man klaro kun nadala pa ini sa jurisdiction sang prosecution.
