POLAND – May nagkalain-lain nga tradisyon nga ginahimo sa tion sang Palm Sunday sa Poland.
Suno kay Bombo Neva Kessler, international correspondent sa Poland, ang Palm Sunday sa ila pungsod ang ginatawag nga Niedziela Palmowa, sa diin ini ang isa ka importante nga bahin sang Semana Santa.
Ginasaulog ini bilang pagdumdom sa pagsulod ni Hesus sa Jerusalem, sa diin ginsugata ini sang mga tawo nga may dala nga lukay.
Sa baylo nga matuod nga dahon sang palma, nagahimo sang mga tao sa nasambit nga pungsod sang colorful nga lukay halin sa laya nga tanom, bulak, sanga sang willow, kag mga ribbons.
May mga kumpetisyon man sa iban nga rehiyon sa diin may mga lukay nga nagadangat sa tubtob 10 meters ang kataason.
Ginadala naman sang mga tawo ang ila lukay sa simbahan sa diin ginabendisyunan ini sang pari.
Matapos ang misa, ginabutang ini sa balay sa pagpati nga taming ini sa kalainan ukon malas.
