Kadungan sang selebrasyon sang Semana Santa, 50 percent lamang ang capacity sang mga tawo ang ginapasugtan sa sulod sang Simbahan sa Singapore.
Suno kay Bombo International Correspondent Mercy Saavedra Cacan, direkta sa Singapore, hugot man nga ginapatuman ang health protocol sa nasambit nga pungsod ilabi na sa sulod sang mga Simbahan sa pagdumdum sang Semana Santa sa diin wala na ginapasulod ang iban nga mga tawo kun malab-ot ang maximum nga 50 percent capacity.
Suno kay Cacan, sa Palm Sunday, ang gingamit nila bilang Ramos, amo ang palm leaves sa diin ginabitbit ini sa mga Simbahan agud ma bendisyunan.
Ginabutangan man suno kay Cacan sang dekorasyon ang palm leaves kaangay sang ribbon kag iban pa.
Pahayag ni Cacan, sa iya ginsimbahan nga The Church of Saint Alphonsus, ukon ang Novena Church sa Singapore, las 7:00 sang aga nagsugod ang Palm Sunday sa diin madamo sang deboto ang nagsimba man kag nagpakita sang ila pagtuo.
Nahibaluan nga ang Palm Sunday ang ginatawag man nga Passion Sunday kag amo ang Kristyano nga tradisyon sa pinakauna nga adlaw sang Semana Santa.
