ILOILO CITY – Desidido si Iloilo City Mayor Jerry Treñas nga pasakaan sang kaso ang mapamatud-an nga nagapang-utod sang Palm tree kag mga bulak sa palibot sang syudad sang Iloilo.
Ini ang kasunod sang insidente sang pagpang-utod sang Palm tree sa tabok sang isa ka residential building and hotel sa Sen. Benigno Aquino Jr. Avenue, Mandurriao, Iloilo City.
Sa interview sang Bombo Radyo kay Treñas, iya ginpahayag nga wala gid niya naluyagan ang pagpanghalit sa mga tanum nga ginpangabudlayan sang Beautification team.
Suno kay Treñas, indi niya mahangpan kun bala ano gid ang tinutuyo sa pagpang-utod sang tanum apang maathag nga ini ang pagpanghalit lamang.
Ginpahayag ni Treñas nga may isa ka jeepney driver nga nakakita sa insidente apang nagapang alang-alang sa pagtestigo.
Sang natabo ang insidente, ginapahayag nga nagakatulog ang duha ka bantay nga green guard nga nagapangatubang sang 3 ka adlaw nga suspension.
