Gin-anunsyo sang Department of Public Works and Highways nga lakip sa prayoridad sang ahensya subong nga tuig amo ang pagtapos sa palpak nga Aganan Flyover sa Pavia, Iloilo nga nagabalor sang P802-million.
Suno kay Public Works Secretary Vince Dizon, nakita mismo ni President Ferdinand Marcos, Jr. ang amo nga flyover kag naakig ini sa sitwasyon kag huol nga dala sang proyekto.
Ang ginatumod sini amo ang pagbisita ni Marcos sa Iloilo sang Agusto 2025 kun sa diin naagyan gid sini mismo ang Aganan Flyover kag na-post pa bangud sa maathag nga kapalpakan.
Una na nga ginpahayag sang DPWH regional office nga ang proyekto nagakinahanglan sang dugang nga P285 million para sa jet grouting sa 23 piers kag para sa widening works.
Buot silingon, ang total project cost nagadangat na sa masobra P1.1 billion.
Matandaan nga nakalab-ot naman sa Senado kag nadiskusyunan sa Senate Committee on Public Services ang palpak nga konstruksyon sang Aganan Flyover nga nagahatag sang perwisyo sa mga pumuluyo sang Iloilo.
Sang amo nga tion, nagmandu ang chairperson nga si Senator Raffy Tulfo nga magpasa ang DPWH sang investigation kag status report.
