Indi kumporme ang iban nga mga kongresista sa mga paagi ni 4th District Quezon City Rep. Bong Suntay sa pagdepensa kay Vice President Sara Duterte kaangot sa ginaatubang sini nga mga impeachment complaints.
Gin-play kahapon sa Kamara ang isa ka parte sang online press briefing ni Sara sang Nobyembre 2024 kun sa diin nagpaandam ini nga kun ipapatay siya, naka-kontak naman siya sang hitman agud patyon si President Ferdinand Marcos Jr., First Lady Liza Araneta Marcos, kag former Speaker Ferdinand Martin Romualdez.
Nagsabat si Suntay kag ginsal-ot sa eksena ang iya misis nga suno sa iya masami man nagapamahog nga patyon siya bangud gab-i na siya nagapauli.
Common sense lang suno kay Suntay nga kun seryoso gid man ang isa ka tawo kaangot sa pagpatay, indi man niya ini pag-i-anunsyo sa kalibutan.
Ginkontra naman ni 6th District Manila Representative Benny Abante ang statement ni Suntay.
Pahayag sini, private citizen ang asawa ni Suntay, samtang indi naman pribado nga tawo si Sara. May gahum ang Office of the Vice President suno sa iya kaangay sang access, impluwensya, kag security resources.
Nahibaluan nga ang amo nga pahayag ni Sara sa “kill order” amo ang isa sa ginbasehan sang pag-file sang impeachment complaint batok sa iya.
