ILOILO CITY – Liwat nga nagpanawagan sa gobyerno ang Paghugpong sang Mangunguma sa Panay kag Guimaras ukon PAMANGGAS nga maghatag sang P15, 000 nga one-time production subsidy subong nga nagadako ang posibilidad nga mag-igo ang El Niño sa Pilipinas sa second half sang 2023.
Suno sa Philippine Atmospheric, Geophysical and Astronomical Services Administration, posible nga magsulod ang El Niño sa tunga-tunga sang Hunyo kag Agosto kag 80% ang posibilidad nga magpadayon ini tubtob sa una nga tatlo ka bulan sang 2024.
Ang El Niño amo ang pagsaka sang posibilidad nga may yara sang “below-normal rainfall conditions” nga magadala sang negatibo nga epekto sa pila ka bahin sang pungsod kaangay sang drought.
Sa interview sang Bombo Radyo kay Lucia Capaducio, chairperson sang Paghugpong sang Mangunguma sa Panay kag Guimaras ukon PAMANGGAS, iya ginpahayag nga madugay na nga nagapanawagan ang ila nga grupo nga maghatag sang ayuda ang gobyerno.
Suno kay Capaducio, 2018 pa sang nagsugod sa pagdamo ang problema sang mga mangunguma sang pungsod humalin sa pagmahal sang farm inputs, ang pandemya, ang La Niña kag subong, ang ginapanan-aw nga El Niño.
Dugang pa niya, subong nga mga tion, ang mga mangunguma ang nagagasto sang P50, 000- P70, 000 sa kada ektarya sang ila duta.
May yara sang mangunguma nga may gamay kita apang ang kalabanan sa ila ang nagabuhin sang production materials kag lubong gid sa utang.
Magluwas sa mahina nga bulig nagikan sa gobyerno, pili lamang nga mga mangunguma ang makabenipisyo sang irrigation program.
Samtang, ginpahayag man ni Capaducio nga sa baylo nga pasanyugon ang produksiyon, mas ginapili sang gobyerno nga magpaghapos lamang pinaagi sa importation.
