DUMANGAS, ILOILO – Wala sang tupong nga pagpasalamat sang 23 anyos nga lalaki sa Ginuo matapos nga makalima ka beses nga naluwas gikan sa kamatayon.
Sa interview sang Bombo Radyo kay Renz Christian Bito-on sang Brgy. Sapao, Dumangas, Iloilo, iya ginpahayag nga tuman ang iya nga pagpasalamat bangud nga ginhatagan siya sang kahigayunan nga mabuhi matapos nga makalima ka beses nga naaksidente sa motorsiklo.
Ginpahayag ni Bito-on nga High School pa lamang siya sadto sang una nga maaksidente bangud sa lubak-lubak nga dalan sa ila lugar sa diin nakaangkon siya sang mga pilas sa lawas ilabi na sa iya guya kag nadulaan sang pangalibutan sa sulod sang pila ka adlaw.
Sa ikaduha nga kahigayunan, liwat nga naaksidente si Bito-on samtang nagamaneho sang motorsiklo kag nakabunggo sa kahoy.
Naka-angkon si Bito-on sang pilas sa lawas, nagisi ang iya ilong kag nagkalakakas ang iya kuko sa tudlo bangud sa mabaskog nga pagkabunggo.
Bangud naman sa madanlog nga dalan tuga sang pag-ulan ang rason sang pagkadisgrasya sang natungdan sa ikatatlo nga kahigayunan kag nabali ang iya tiil.
Sa ika-apat nga kahigayunan, liwat naman siya nga nakaasidente sa ginamaneho nga motorsiklo kag naka-angkon sang mga pilas sa lawas.
Sang nagligad nga tuig, liwat na naman nga naaksidente si Bito-on samtang sakay sa motorsiklo nga ginamaneho sang iya pakaisa.
Sa nasambit nga aksidente, nakaangkon si Bito-on sang patal nga pilas sa lawas ilabi na sa iya ulo sa diin bisan ang doktor ang nagprangka na nga tuman ka gamay sang kahigayunan nga mabuhi.
Samtang yara siya sa ospital, ginpahayag sang natungdan nga nakita niya sa iya paminsaron ang isa ka lalaki nga nakasuksuk sang puti nga panapton kag kasubong nga ginapangamuyu-an siya.
Indi man malikawan suno sa natungdan nga kun kaisa nakabatyag man sang siya ‘self pity’ bangud sa iya naangkon nga sablag sa lawas tuga sang aksidente apang nagapangibabaw ang iya pagpati sa Ginuo kag ang pagpalangga sa iya kaugalingon kag sa iya pamilya.
Kun wala niya naagyan ang mga nasambit nga pagpanghangkat suno kay Bito-on, wala niya natun-an nga mas mangin malapit sa Ginuo kag mas nangin mabakod sa pag-atubang sa mga pagpanghangkat sa iya kabuhi.
