ILOILO CITY – Nakuha sang pambato sang Bulacan ang pinakauna nga The Miss Philippines pageant crown.
Ginlutos ni Alethea Ambrosio ang 20 ka iban pa nga kandidata sa ginpatigayon nga coronation night sa Mall of Asia Arena sa Pasay City.
Natalana nga i-represent ni Alethea kag sang nabilin sa Top 4 sang The Miss Philippines 2023 ang pungsod sa international stage.
May separado nga crowning ceremony sa February 2024 sa tatlo ka mga beauty queens nga sanday Issa De Los Santos sang Mandaluyong, Chantal Schmidt sang Cebu City, kag Blessa Ericha Figueroa sang Northern California.
Samtang, nalakip naman sa Top 10 ang pambato sang Iloilo City nga si Miss Iloilo 2023 Shaine Saulog.
Sa subong, ang Miss Philippines ang nagakapot sang franchise sang Miss Supranational, Miss Charm, kag Miss Asia Pacific International.
Ang The Miss Philippines ang sister pageant sang Miss Universe Philippines.
Si Pauline Amelinckx ang gin-proclaim bilang pinakauna nga Miss Philippines titleholder matapos ang first runner-up finish sa Miss Supranational 2023.
Ang pinakauna nga The Miss Philippines coronation ang kabahin sang The Filipino Festival nga nag-feature man sang Mister Pilipinas Worldwide competition.
Nagdaog si Brandon Espiritu sang Guam sa male pageant.
