ILOILO CITY – Gindumdom sang mga himata, abyan kag mga anay manunudlo sini ang kabuhi ni Joanna Daniela Demafelis, ang Ilongga OFW nga ginpatay sang iya mga amo sa Kuwait.
Kaina sang hapon ginpatigayon ang necrological service para kay Joanna, sa puluy-an sang mga Demafelis sa Barangay Ferraris, Sara, Iloilo.
Sa interview sang Bombo Radyo Iloilo, ginpahayag sang tiyo ni Joanna nga si Barangay Kagawad Pablo Demafelis nga naghatag sang eulogy si Overseas Workers Welfare Administration (OWWA) Administrator Hans Leo Cacdac.
Nagtambong man ang mga abyan kag mga manunudlo ni Demafelis sang elementarya pa ini.
Sa bahin sang pamilya, ang magulang ni Joanna nga si Joejit Demafelis ang naghatag sang mensahe.
Buwas natalana nga ilubong si Joanna sa Sara Public Cemetery.